Ташкент салаты

Алты адамға арналған рецепт.

Қажетті тағам түрлері

• 500 г шомыр
• 150 г пісірілген сиыр еті
• 2 пияз
• 100 г қаймақ немесе майонез
• 2 жұмыртқа
• 30 г өсімдік майы

дәміне қарай тұз бен бұрыш және салатты безендіру үшін ақжелкен.

Дайындау тәсілі

Жасыл шомырды аршып тазалап, ұзын әрі жұқа етіп турайды. Шомырдың иісі кету үшін турағаннан кейін оны жарты сағаттай салқын суға салып қояды. Сосын суы сорғып біткенше сүзгіште ұстайды.

Піскен етті де ұзыншалап турап, шомырға қосады. Оның үстіне домалақтап туралған жұмыртқаны салып, тұз бен бұрышты себеді. Пиязды майға қуырып, оны етпен араластырады.

Үстелге қоярдың алдында майонез немесе қаймақ құйып, ақжелкенмен безендіреді. Өте тойымды салат түрі болып есептеледі.